Asistencia persoal

"Co teu apoio, eu elixo"

A asistencia persoal é unha ferramenta clave para o exercicio do dereito á vida independente das persoas con discapacidade intelectual ou do desenvolvemento.

Desde hai varios anos, desde o movemento asociativo de Plena inclusión vimos propoñendo e desenvolvendo a Asistencia Persoal como ferramenta humana imprescindible para que unha persoa con discapacidade poida vivir como o resto da cidadanía.

A través deste rol profesional asegúrase que a vontade da persoa con discapacidade sexa respectada en calquera caso e, por tanto, decida sobre todos os aspectos da súa vida, tal e como ocorre ás persoas sen discapacidade.

Aínda así, ata o momento son poucas as persoas con discapacidade intelectual ou do desenvolvemento que poden acceder a este tipo de prestación e apoio, existindo así mesmo, diferenzas entre as comunidades autónomas.

A FIGURA DO ASISTENTE PERSOAL

O asistente persoal é unha figura profesional que apoia, axuda ou contribúe a que a persoa poida realizar tarefas da vida cotiá en distintos ámbitos (laboral, familiar, formativo, de lecer, social e/o privado) e a que decida como e cando quere facelas.

Os apoios deben ser flexibles, personalizados e respectuosos coas decisións da persoa con discapacidade, que é quen ten o control e:

decide como, onde e cando quere recibir os apoios,
elixe o seu asistente persoal,
decide en que actividades vai apoiar.

No caso de persoas con grandes necesidades de apoio, serán xeralmente os seus familiares quen tome as decisións en función das preferencias e necesidades da persoa con discapacidade.

Aínda que dependen dos apoios que necesite cada persoa, de maneira xeral as tarefas son:

Persoais: relacionadas directamente coa persoa.
Do fogar: realizadas dentro da vivenda.
De acompañamento: en calquera contexto da vida da persoa.
De desprazamento: relacionadas co acompañamento nos traslados.
De comunicación: interpretación de diferentes sistemas comunicativos.
De coordinación: relacionadas coa planificación e o apoio á toma de decisións.
Excepcionais: provocadas por situacións concretas de saúde.
Especiais: vinculadas con ámbitos de intimidade da persoa ou da actividade sexual.

Para saber máis sobre asistencia persoal, podes ver este vídeo: “Que é a asistencia persoal: Cóntocho cun café”.

PUBLICACIÓNS RELACIONADAS

Nesta ligazón podes consultar as diferentes publicacións do noso movemento asociativo, sobre a figura do asistente persoal.