Informe da situación da Atención temperá
Datos Xerais:
Categoría: Accesibilidade
Publicado: 2024
Autoría: Plena inclusión España
Publicación para: profesionais
Organización: FADEMGA Plena inclusión Galicia
Tema: Apoios
Descrición:
No centro da filosofía, as políticas e as prácticas da atención temperá están todos os nenos
e nenas e as familias. Por iso, neste documento que mostra a situación dos centros e servizos
de Atención temperá que forman parte do movemento asociativo o noso agradecemento
vai dirixido a eles en primeiro lugar. Non en balde as familias son a base do noso movemento
asociativo, por todo o que nos ensinaron ao longo dos anos, como nos axudan a cuestionar
as nosas certezas e estar dispostas a compartir o valioso da experiencia vital, e máis neses
primeiros anos de desenvolvemento, cruciais para construír comunidades nas que todos e todas
teñamos as mesmas oportunidades e que dan sentido ao noso traballo.
O obxectivo deste traballo é visibilizar a necesidade e urxencia no desenvolvemento dun Sistema
Nacional de Atención Temperá que a garanta como un dereito subxectivo, universal, público e
gratuíto, tal e como recolle no seu marco conceptual a folla de roteiro para a mellora da atención
temperá en España.
Este dereito non implica só aos nenos e nenas con algunha discapacidade ou risco do seu desenvolvemento e
as súas familias, senón que nos interpela a toda a sociedade e contribúe ao benestar de toda a infancia.
A transformación é un proceso de ámbito internacional no campo da discapacidade intelectual
ou do desenvolvemento e conta cunha base importante de coñecemento baseado na ciencia, a evidencia
e a experiencia, pero ademais é un proceso derivado da convención dos dereitos das
persoas con discapacidade e que por tanto ten impacto nas políticas públicas.
Plena inclusión, movemento asociativo español en favor das persoas con discapacidade
intelectual ou do desenvolvemento e as súas familias, iniciou xa no ano 2013 diferentes proxectos para avanzar
na transformación dos seus centros e servizos cara a servizos centrados na persoa e nas
súas familias, orientados á plena cidadanía en comunidades diversas. Os centros de Atención
Temperá foron un dos primeiros servizos en “subirse a este tren”, algo que di moito do
carácter dos e as profesionais e as familias que os compoñen, que atopamos sempre en continua
revisión das súas prácticas e repensando fórmulas para garantir os mellores resultados e
o maior benestar para os nenos e nenas e as súas familias.
Mostra desta resiliencia e capacidade de adaptarse ás necesidades cambiantes da contorna, visibilizouse
no período de confinamento debido á situación de pandemia da COVID-19, nas
que se adoptaron medidas para seguir xerando espazos onde acompañar ás familias no seu día
a día.
