Xa podes anotarte no Encontro Autonómico de Familias 2026!
Unha xornada para escoitar ás familias, compartir experiencias e fortalecer a súa participación na vida asociativa.
FADEMGA Plena inclusión Galicia
06-07-2026Dende FADEMGA Plena inclusión Galicia abrimos a convocatoria para participar nunha nova edición do Encontro Autonómico de Familias, que este ano celebraremos baixo o lema “Con voz propia”.
A xornada terá lugar o sábado 19 de setembro de 2026, no Gran Hotel Los Abetos, en Santiago de Compostela, e estará dedicada á toma de decisións informadas, á comunicación no ámbito familiar e á participación activa das familias nas organizacións.
Queremos que este encontro sexa un espazo para escoitar, compartir experiencias e poñer en común dúbidas, necesidades e propostas. Unha xornada na que as persoas con discapacidade intelectual e as familias terán voz propia para falar do que importa no día a día e do papel que xogan as familias como apoio, acompañamento e parte activa da vida asociativa.
Ao longo do día abordaremos cuestións como as decisións informadas dende a experiencia do servizo xurídico, ferramentas para mellorar a comunicación dentro das familias e a participación das familias no rumbo das organizacións.
PROGRAMA E INSCRICIÓN
As persoas interesadas deberán cubrir o formulario online coa axuda dun profesional da súa asociación.
O prazo para enviar a inscrición remata o 31 de xullo.
Non se admitirán inscricións fóra de prazo.
As familias que precisen servizo de respiro familiar durante a celebración do encontro deberán indicalo no formulario e enviar a documentación correspondente tamén antes do 31 de xullo.
COTAS
A asistencia ao encontro terá un custo de 15 euros por persoa.
O servizo de respiro familiar terá un custo de 15 euros por persoa, só para quen o solicite.
Tamén procuraremos habilitar transporte para as familias, en función da demanda e da súa viabilidade. No caso de confirmarse, terá un custo adicional de 10 euros por persoa.
As inscricións admitidas confirmaranse a partir do 7 de setembro.
Para máis información, podedes chamar ao 981 51 96 50 ou escribirnos a familias@fademga.org
ESPERÁMOSVOS!
Actividade financiada a través da asignación tributaria do 0,7% do IRPF, da Consellería de Política Social e Igualdade da Xunta de Galicia, grazas ás persoas que marcan o recadro de Fins Sociais / X Solidaria na súa declaración da renda.
