FADEMGA recibe unha nova subvención nominativa do Concello de Lugo para reforzar o apoio ao emprego en 2025

FADEMGA Plena inclusión Galicia

31-10-2025

FADEMGA Plena inclusión Galicia vén de recibir unha subvención nominativa do Concello de Lugo por importe de 3.000 euros, correspondente ao exercicio 2025, destinada a apoiar o desenvolvemento de dous servizos clave para a inclusión laboral das persoas con discapacidade intelectual ou do desenvolvemento na cidade de Lugo.

A axuda permitirá reforzar o Servizo de Información e Orientación Laboral (SIOL) e o Servizo de Apoio ao Emprego (SAE), dous recursos fundamentais para acompañar ás persoas nos seus procesos de acceso, mantemento e promoción no mercado laboral, sempre desde unha perspectiva individualizada e centrada na persoa.

Grazas a este apoio económico, FADEMGA poderá seguir ofrecendo orientación especializada, asesoramento personalizado e apoio continuado ás persoas con discapacidade intelectual ou do desenvolvemento, favorecendo así a súa autonomía, a mellora da empregabilidade e a igualdade de oportunidades no ámbito laboral.

Dende a Federación queremos agradecer ao Concello de Lugo a súa colaboración e compromiso coas políticas de inclusión social e laboral, así como o recoñecemento ao labor que desenvolven os servizos de emprego especializados para garantir dereitos e oportunidades reais ás persoas con discapacidade.

Esta subvención contribúe a consolidar o traballo que FADEMGA e as entidades que a integran realizan no territorio, reforzando unha rede de apoios imprescindible para avanzar cara a unha sociedade máis xusta, inclusiva e accesible para todas as persoas.