Abrimos as inscricións para o 20º Seminario de Discapacidade Intelectual e Saúde Mental
Vinte edicións compartindo coñecemento e buscando mellores maneiras de acompañar ás persoas.
FADEMGA Plena inclusión Galicia
15-10-2026Como podemos apoiar mellor ás persoas con discapacidade intelectual que teñen problemas de saúde mental? Esta pregunta guiará o 20º Seminario de Discapacidade Intelectual e Saúde Mental de FADEMGA Plena inclusión Galicia, que se celebrará o 20 de novembro na Facultade de Psicoloxía da Universidade de Santiago de Compostela.
Nesta edición abordaremos a relación entre epilepsia e saúde mental nas persoas con discapacidade intelectual ou do desenvolvemento, a importancia de como escoitamos e acompañamos e as intervencións non farmacolóxicas. Compartiremos experiencias que amosan como as relacións, o apoio ás familias e a coordinación entre servizos poden mellorar a vida das persoas.
Descarga aquí o programa completo e toda a información para inscribirte.
A xornada, declarada de interese sanitario, está dirixida a profesionais, familiares, voluntariado, estudantes e calquera persoa interesada nesta temática.
O primeiro prazo de inscrición estará aberto ata o 13 de novembro, con tarifas reducidas respecto do segundo prazo, que irá do 14 ao 18 de novembro.
Agardámoste para compartir aprendizaxes e seguir construíndo unha atención máis próxima ás persoas!
