Abrimos a convocatoria de «Concilia con Tradición», con dúas saídas para celebrar o Samaín e o Magosto
As familias interesadas poden solicitar a participación a través da súa entidade. O prazo de presentación de solicitudes remata o 15 de outubro.
FADEMGA Plena inclusión Galicia
02-10-2026Desde FADEMGA Plena inclusión Galicia poñemos en marcha «Concilia con Tradición», unha proposta que combina o apoio á conciliación co gozo das tradicións.
A convocatoria ofrece dúas saídas, Samaín e Magosto, dirixidas a persoas con discapacidade intelectual ou do desenvolvemento das entidades federadas.
A iniciativa busca facilitar tempos de descanso ás familias e contribuír ao benestar das persoas coidadoras. Ao mesmo tempo, ofrece ás persoas participantes unha oportunidade para compartir actividades, coñecer xente doutras entidades e gozar de experiencias de convivencia e participación social.
Dúas saídas para vivir o outono
As estadías terán unha duración de 4 días e 3 noites, con aloxamento en réxime de pensión completa e un programa de actividades vinculado ás tradicións populares galegas:
- Saída Samaín: do 29 de outubro ao 1 de novembro, no Hotel Balneario Laias Caldaria, en Ourense.
- Saída Magosto: do 10 ao 13 de novembro, no Hotel Balneario Arnoia, en Ourense.
En cada quenda poderán participar dúas entidades federadas, cun grupo de 9 persoas por entidade, das cales un mínimo de dúas serán persoal de apoio.
As entidades organizarán os grupos e os apoios necesarios, e asumirán os desprazamentos ata o lugar da actividade e os que se realicen durante a estadía.
Onde podes consultar máis información?
Nestes documentos podes consultar as condicións para participar, os documentos que hai que presentar e as actividades de cada saída:
