Aberto o prazo de inscrición no curso “Liderado na práctica”
Un curso para reflexionar, guiar e reforzar o liderado profesional no desenvolvemento de bos apoios.
FADEMGA Plena inclusión Galicia
13-04-2026FADEMGA Plena inclusión Galicia abre a convocatoria do curso “Liderado na práctica”, unha proposta formativa dirixida a responsables de servizos e persoas xestoras de equipos que queiran reforzar o seu papel no acompañamento profesional e no desenvolvemento de bos apoios.
A formación será impartida por Laura Garrido Marijuán, directora técnica de persoas en APADIS e colaboradora en programas de Plena inclusión, e desenvolverase en liña, a través da plataforma de formación de Plena inclusión, do luns 4 de maio ao luns 15 de xuño de 2026.
Ademais do traballo na plataforma, o curso inclúe dúas sesións en modalidade de aula virtual, que terán lugar nos seguintes días:
14 de maio, de 17.00 a 18.00 horas
28 de maio, de 17.00 a 18.00 horas
Entre os obxectivos desta acción formativa destacan:
- Crear ferramentas para que os e as profesionais poidan desenvolver un liderado aplicado á práctica diaria;
- Reflexionar sobre as claves para mostrar, orientar e guiar o camiño no desenvolvemento de bos apoios.
INSCRICIÓNS
O prazo de inscrición estará aberto do 13 ao 23 de abril.
As persoas interesadas poden formalizar a súa solicitude a través deste formulario e consultar o programa completo do curso aquí.
Unha vez rematado o prazo de inscrición, a admisión do alumnado comunicarase a partir do 27 de abril, por correo electrónico, ao enderezo indicado na solicitude.
Esta acción formativa é de balde grazas ao financiamento do Ministerio de Dereitos Sociais, Consumo e Axenda 2030.
