A Universidade da Coruña acolle unha xornada estatal para avanzar na sostibilidade das entidades de Plena inclusión
Plena inclusión España e FADEMGA Plena inclusión Galicia reunirán o 24 de setembro a profesionais e responsables de organizacións de toda España para compartir coñecementos, estratexias e prácticas exemplares
FADEMGA Plena inclusión Galicia
16-09-2026O Paraninfo da Universidade da Coruña acollerá o próximo 24 de setembro, de 10.00 a 18.00 horas, a xornada “Soster para avanzar: aprendizaxes e estratexias para a sostibilidade organizacional nas entidades de Plena inclusión”, organizada por Plena inclusión España xunto a FADEMGA Plena inclusión Galicia. A xornada será un espazo para compartir aprendizaxes, estratexias e prácticas exemplares relacionadas coa sostibilidade organizacional.
Durante o encontro abordaranse cuestións como a gobernanza, as organizacións que aprenden, o coidado das persoas e os equipos, a calidade, a innovación, as alianzas e as economías coherentes coa misión das organizacións. Tamén se presentarán estudos realizados por Plena inclusión e a Universidade da Coruña e analizaranse tendencias e recomendacións para avanzar na sostibilidade económica das entidades.
A xornada está dirixida especialmente a persoas que toman decisións nas organizacións, forman parte de equipos de dirección ou coordinación, traballan en planificación e xestión, participan en órganos de goberno ou desempeñan funcións de dirección de Recursos Humanos.
Sostibilidade, impacto social e situación económica das entidades
A profesora Marta Rey-García, catedrática da área de Comercialización e Investigación de Mercados da Universidade da Coruña, e o profesor Luis Ignacio Álvarez-González, catedrático da mesma área na Universidade de Oviedo, participarán nunha sesión sobre sostibilidade organizacional, goberno, capacidades organizativas e impacto social. Ambos intervirán tamén, xunto a Alejandro Fernández-Marzoa, doutorando en Análise Económica e Estratexia Empresarial da Universidade da Coruña, na presentación dunha análise sobre a caracterización financieira e a contribución ao PIB das organizacións de Plena inclusión.
Pola tarde abordarán estratexias, escenarios, tendencias e recomendacións de xestión para avanzar na sostibilidade económica.
Sete prácticas exemplares de diferentes territorios
Un dos contidos centrais do encontro será a presentación das sete prácticas gañadoras seleccionadas polo Comité Científico da xornada.
Nas categorías de Gobernanza e Organizacións que aprenden presentaranse:
- Autismo Cádiz: “Tres plans, un mesmo rumbo: un modelo único de gobernanza para integrar estratexia, excelencia e Calidade Plena”.
- AUNA Inclusió: “Escoitar para construír: porque un fogar non se organiza, constrúese con cada persoa”.
Nas categorías de Coidado das persoas e desenvolvemento de equipos e Calidade participarán:
- FUTUCAM: “Sistema integral de benestar psicolóxico, coidado e desenvolvemento profesional de FUTUCAM”.
- ASPACE Bizkaia: “UZTARTZEA: sistema de avaliación e mellora da conciliación en ASPACE Bizkaia”.
A programación da tarde incluirá as prácticas correspondentes ás categorías de Innovación, tecnoloxía e alianzas e Economías coherentes coa misión:
- Fundación ASPANIAS Burgos: “Cultura Comprensible: accesibilidade cognitiva con liderado comunitario”.
- Asociación APROSU: “Xerando Valor Social”.
- Central Española de Compras Diversidade, S. L.: “Liberar recursos para a inclusión”.
Unha mesa de debate sobre os retos de futuro
A xornada finalizará cunha mesa de debate dedicada ás claves de futuro, na que participarán:
- Marta Rey-García, catedrática da Universidade da Coruña.
- José Antonio Seoane, catedrático da Universidade da Coruña.
- José Antonio Idoeta, presidente de FEVAS e CEO do Grupo Soltra.
A mesa estará moderada por Enrique Galván, director de Plena inclusión.
O programa completo e o formulario de inscrición poden consultarse nesta ligazón.
Podes realizar a túa inscrición aquí.
